دام برس - من مغتربة تعشق تراب سورية
أتعهد بأنو بس تخلص الأزمة و نرجع نعيش بأمان ..
• ما رح أتأفف من العيشة بسوريا و قديش الحياة صايرة ملل و بتضيق الخلاق
• ما رح أقلب خلقتي بس مر من حارة و تهاجم أنفي رائحة السياقات المخلوطة بريحة شجرة ياسمين مصطهجة بهالسماد
• ما رح سب و ألعن سلسفيل جدو لسواق الميكرو يللي كسر علي من حيث لا أدري .
• ما رح قول يا عمي أي هديك بلد و هي بلد .. شو جاب لجاب
• ما رح قول .. يا عمي و الله نحنا شعب بجم و بحياتنا ما بنصير بني آدمين
• ما رح نق من كتر الشوب بالصيف و سقعة البرد بالشتي
• ما رح سب على بياع الغاز يللي بيلعلع صوتو من الصبح و هو عم يطرطق عالقنينة و ينادي غاز غاز
• ما رح أتأفف من سواق التكسي يللي معلي صوت المسجلة عالآخر و مغطي العداد بمخدة صعيرة
• ما رح ضل أتساءل ليش بأوروبا و الدول المتقدمة ما عندن دبان قد ما في عنا
• ما رح أتأفف من العجقة و سواقة النسوان و الختايرة و الشباب الطايش
• ما رح أعطي الشرطي رشوة و أنا عم قلو بقلبي تصرفن على عافيتك
• ما رح نق و سق من أنو ما في تسلاية بالبلد غير روحة المطاعم
• ما رح أتضايق من قطع الكهربا لمدة ساعتين بس
• ما رح ألعن الساعة اللي بلشو فيها قطع المي بعد الساعة 11 و أنا راكضة للحق وجبة الغسيل الصبح
• ما رح أقلب خلقتي و أنا ماشية بالشارع و كأنو كان في حدا مارق من شوي قبلي و ذكريات رائحة عرقو علقانة بالهوا و أنا عم أستنشقها
• ما رح أنتقد وساخة شعبنا الجسدية و أتفلسف و قول .. يا عمي المي ببلاش و الصابونة بخمس ليرات ليش الناس ما عم تتحمم ؟؟
• ما رح قول .. يا سيدي صايرة العيشة بالبلد بتطقق
لأنو العيشة ببلدنا ما بتطقق .. بلدنا أحلى بلد بالعالم .. بعجرها و بجرها .. و بسذاجتها و أخطاءها .. بشرشحتها و أناقتها .. ما بدي عيش بمكان تاني .. اتعهدوا متلي .. بركي بترجعلنا .. بركي بتبطل زعلانة منا .. بركي بتحن علينا بعد ما قسينا كل هالوقت عليها .. بركي بتصدق قديش بنحبها و قديش ما فينا نعيش بدونها ..
Envoyé de mon iPhone