دام برس - خاص:

شعور حلو كتير انك ترفع اسم بلادك بالعالي بأي محفل سياسي، رياضي، اقتصادي، فني وشو ما بيخطر عبالك.
كلياتنا مننبسط ومنحس حالنا نحنا يلي تتوجنا بس يقولو اسم "السوري فلان، أو السورية فلانة فاز بلقب أو توجت بجائزة أياً كان معناها أو مناسبتها،  بس لأنو سورية فوق الكل وأغلى من الكل منفرح وكأنو إنجازنا الشخصي..
بلادك غالية وحتضل بقلبك وين ما رحت بعلم وبلا علم، بنشيد وطني أو بدون، بوسام أو بلا، الوطنية بالقلب قبل ما تكون بالماديات الموجودة حواليك..
طبعاً صار واضح من مقدمتي "الطويلة" نوعاً ما عن شو عم احكي..
حازم شريف ابن الشهباء حقق من يومين لقب الآرب آيدول كأول سوري بيفوز باللقب بالموسم التالت من البرنامج يلي بترعاه مجموعة "إم بي سي" المعروفة شو سياستها سلفاً من أربع سنين، بس حازم بنظر البعض طلع خاين ويمكن عميل ولربما يكون فوزو بالبرنامج واسطة أو ضربة حظ !! مين بيعرف ؟؟!
شخصياً مالي من رواد الأرب آيدول لأني ما بقتنع احرق 3 ساعات ع برامج أغاني، اتركك مني، وركز معي عطريقة التعاطي مع أي فكرة كيف بتكون عنا !!
جماهيرية حازم صارت كل مالها بازياد والمعجبين ع مواقع التواصل ماشالله صاروا بالآلاف بظرف كم شهر، وحتى العالم صارت تصوت بكترة بآخر 3 اسابيع وقت قرب من اللقب، مع انو بظروف متل يلي عم تعيشها بلدنا آخر همو للواحد يلتفت على هيك قصص.. بس لأنو سوري وبيستحق يربح العالم اندمجت مع الفكرة..
لحد هون كان كلشي تمام لوقت ما طلعت نتيجة التصويت وفاز حازم وحسينا كلنا انو ربحنا معو، انجاز ممكن يكون شخصي بس اعتبارنا انجاز جماعي لانو كان تحت اسم وطن تعبان وعم ينزف من سنين..
لوقت ما اجا كم منظر "اجتماعي" عالفيسبوك وحاول ينزع هالفرحة، طبعاً هاد شي متوقع بحكم أنو شعب من كتر ما بيحب يسيس القصص صار عندو متلازمة اسمها "التخوين" طبعا هيك متلازمة بيلحقها أخوات متل الإقصاء والإلغاء والشطب الكلي للآخر في حال ما اتفقت مع رأيو..
الذنب الوحيد للشب يلي عمرو 21 سنة انو ما قدر بشكل أو بآخر انو يرفع علم بلدو.. لأسباب يمكن تكون مجهولة، وانهالت هالشتائم والمسبات والتعليقات بشكل مو طبيعي بظرف دقايق، يلي انتقدوا أكتر من يلي نقدو.. حتى في بعض "العبقريين" وصلوا لنتيجة انو موقع اتفاق مع ال" ام بي سي " انو بيفوز باللقب الا ازا وافق ع شرط رفع العلم.. انو انت يا محلل زمانك كنت بالكواليس وقت وقعوا هالاتفاق؟؟
طيب ما انتبهت انو نفس الشب رفض يرفع علم عربي غير علم بلدو ولا دغري لقيتها فرصة لتكتب عالفيس بوك شو صار لتلحق تعمل السبق الصحفي تبعك وتجيب لايكات ؟؟؟!
كلنا منعرف شو سياسة مجموعة " ام بي سي" ومين الأشخاص يلي بتدعمها والدولة يلي واقفة وراها، لهيك ممكن تتفسر القصة بأكتر من سبب ومسبب من دون ما نسيء لشخص واحد ! 
ما علينا.. طريقة التعاطي مع أي خبر حالياً مستحيل تخلو من التسييس للأسف، ولو كانت القصة بعيدة كل البعد عن السياسة، طيب حاجي معك حابب تحلل وتاخد موقف لا تعمم هالشي على غيرك، احتفظ فيه رأي شخصي.. هيك بتكون غم تصقل شخصيتك عالأقل ولا شو رأيك ؟؟
خلينا نكون أوعى وأنا بطالب حالي بهالشي أول واحد ونلتفت للجانب الإيجابي من كل قصة، حاكم والله ما عدنا ناقصين علّة قلب أكتر من هيك، خلص زلمة سوري فاز وما قلل احترام أو هيبة لدولتو ووطنو المفروض كلنا نفرح لهالشي.. متل ما توحدنا عالحزن والأسى خلونا نتوحد وقت الفرحة ونبعد ولو نتفة عن صغائر الأمور، يلي ما بيجي منها الا اللايكات في حال غلي سوقها..
وعقبال ما كل ولاد بلدي يكللهم الغار والسلام والنجاح والتفوق ونكحل عيونا بدموع الفرح لأنو أصلا بيلبقلنا ...

وسيم قشلان