دام برس - وسيم قشلان :

اليوم رح نحكي عن موضوع شوي شبابي أكتر ما يكون بناتي.. ولو انو بتتداخل المصالح فيه أحياناً..
الرياضة.. شي أساسي بحياة كل واحد فينا.. وقلال كتير الأشخاص يلي ما بيمارسوا ولو نوع رياضة واحد بحياتن.. المشي مثلا رياضة يومية وغير مكلفة إطلاقاً  حتى إنها إلزامية بوقتنا الحالي..
مفهوم الرياضة واسع كتير وقد ما حكينا عنو ما منخلص.. بس كرة القدم هية الرياضة الشعبية الأولى بسوريا.. هالرياضة بالزات الها خصوصية بحياة كل شب فينا.. مين فينا ما لعب طابة بالحارة مع رفقاتو.. وهرب من حصص المدرسة كرمال لعبة طابة... وتسلل بطريقة أو بأخرى ليفوت يحضر مباراة لفريقو المفضل بالملعب..
حتى ونحنا وصغار لو سألت طفل شو طموحك أو هوايتك كتير وارد يقلك اني اطلع لاعب كرة قدم أو أي رياضة تانية حسب ميولو.. المهم برمجة مخو من الصغر بتكون رياضية بحتة..
ولأنو أحلامنا بتضلها أحلام وصعب تتحقق بظل عدم وجود عقلية رياضية مناسبة بالبلد للاعتناء بالمواهب الحقيقية وصقلها بمدارس كروية والاستفادة منها محلياً وخارجياً.. اندفن هالحلم جواتنا علماً انو هاد مو محور موضوعنا بس كان لا بد من التنويه!!
وبحكم انو رياضتنا ومنتخباتنا وأنديتنا متل المي بطلوع.. شبابنا قرر ينتقل للخطة "ب" ويلي هية تشجيع فريق فوتبول عالمي.. الانتماء شي جوهري وأساسي بحياة كل إنسان.. حلو كتير انك تنتمي لوطن.. لقضية.. لفكرة.. وما احلاها لما تكون لنادي أو منتخب فوتبول معين...
أديش حلو لما تكون مارق من جنب شي قهوة أو مطعم وتشوف العالم متحمسين لمباراة عم يتابعوها ومشدودين وكأنو منتخب بلدن يلي عم يلعب.. علماً انو غالبنا ما بيكون الو من اللعبة لا ناقة ولاجمل.. وغالبا بتكون بين فرق أوروبية.. فوزن أو خسارتن لا بتسمن ولا بتغني من جوع غير اللهم بالشماتة !
حالياً صعب تسأل حدا عندو شغف بالفوتبول، سؤال عفوي ها.. مين بتشجع؟؟ ويقلك مدريدي أو كتالوني.. وكأن جدو السابع عشر ولدان بنص "الفالديباس" يلي هوة مقر تدريب فريق ريال مدريد هاد بالنسبة لأخونا المدريدي، أو وقت يندفع رفيقي البرشلوني بالجواب أكتر من متعصبين كتالونيا يلي عم يطالبو بالانفصال لللإقليم وما زبطت معن آخر شي !
المونديال وما أدراك ما المونديال.. هداك لحالو قصة تانية.. بحكم انو كل اربع سنين ليطل علينا مرة وحدة.. بتلاقي يلي بيفهم ويلي ما بيفهم عم يشجع ومتحمس من قلبو.. ولك حتى اللعب الفاشلة "كرويا" بيتابعها وبأدق تفاصيلها.. على مبداً كلشي ببلاش كتر منو !
ولك حتى الجنس اللطيف مع احترامي لثقافتن الرياضية المتواضعة بتندمج معك وبتفوت عالخط.. بس صديقتنا غالباً بتشجع إيطاليا بحكم انو شبابها حلوين وكيوت وموديرن.. أو بتنتقل لتشجيع الأرجنيتن في حال كانت من معجبين ميسي وبينطيق نفس الحال عالبرتغال ازا كانت مهووسة برونالدو، او عند احتمال تكون تشجع فريق تاني كرمى لحبيبها أو زوجها، أو يمكن جكر فيه، مين بيعرف؟!
أما العالم يلي مو متابعة بتلاقيها عم تشجع 21 فريق.. حاسبها صح أخونا.. كل ما يطلع فريق بينط أوتوماتيكياً للفريق يلي بعدو.. وبس تسألو ولك انت كنت إسباني بزمانك.. بيقلك اللعب الألماني راقي.. هدول جماعة منظمين ولعبن هندسة.. اه منك شو شغوف باللعبة وعند كلمتك !
وعندك عالم بس بتحب الجو مو أكتر.. على مبدأ "نحنا مع اللعبة الحلوة" وفي فئة محرزة من العالم الكبار يلي ما خرطت مشطها فكرة الفوتبول كلها.. بيقلك بكل برود "معقول تحرق ساعتين مشان كم واحد عم يلحق شقفة مطاط"، هون انت اوعك تناقش مشان ما يشوطك عمو بطريقو !
بغض النظر عن كلشي فئات حكينا عنها.. بحب قلكن انو شعبنا رياضي ومن الطراز الرفيع.. ومتابع من الدرجة الأولى.. بس بتعيبو شغلة وحدة.. التعصب الزايد والاندماج وتقمص الدور أكتر من اللازم.. انو لعبة خلصت عصبلك كم ساعة.. ولك خليها يوم سيدي،بس مو توصل معك لتعلق مع رفيقك لانو بيشجع فريق ما بتحبو.. تزكر انو هاد حيضل رفيقك وصداقتك معو ما بتوقف على لعبة مدتها 90 دقيقة!!
هلأ بينك وبين حالك حتقول شو بدو هالمفزلك حتى جايي عم ينظر علينا.. حجاوبك وقلك اني كنت وما زلت متعصب اكتر منك لفريق بشجعو من 16 سنة.. بس بآخر سنتين حسبتها منيح انو شو رح استفيد ازا نزعت علاقتي بحدا مشان لعبة طابة.. مو جاييني منها الا حماسها وشغفي للفريق يلي بشجعو.. يلي يمكن لعيبتو بحياتها موسمعانة ببلدي!

عيش الحدث والحالة واللحظة كمان ازا بدك.. بس خلي عندك خط رجعة لتعرف انو انا وانت و"انتي" ممكن ما حدا سائل عن عصبيتنا هي.. ويمكن اللاعبين من جديد لعرفو انو الن مشجعين بسوريا !!
انفعل.. عصب.. شجع بقلبك وبروحك.. وشمات حتى تشبع بس تزكر انو آخر شي انو هالمباراة حتخلص وصداقتك مع رفيقك أو جارك أو قرايبك يلي بيشجع غير فريق وعصبت عليه ورفعتلو الكرت الأحمر مالها حتخلص كرمال لعبة.. الحياة رح تمشي ان فاز ريال مدريد او خسر بايرن ميونخ.. في حال تتوج برشلونة.. او هبط مانشستر يونايتد..