دام برس:

الامريكان نطوا انجليزى

حرقوا العراق والسيرك فى بلدنا اتنصب

ع الشط فوق خيمة العرب

عملوا العزومه وكان البطل "دندى "

افندى وكام ألف غاندى -

ونتايه من وز العراق

فى صنيه من لحم الشعوب

ليلة ميلاد سيدنا الوصى

سنه حلوه يا جميل

رمضان كريم

الفدو ابدا ولا الصيام

يا شعوب اغنام ..!!!؟

كل عام وانتم نيام

وانتوا القصاير كل عام

وأنا الغفير ..

قاموا الأشاوس يدهنوا كتف الأمير

ويزوقوا "مونيكا"

غنى يا هرمونيكا

وسدّى خرم الناى

الخوف شنق جواى ,آخر صاروخ "اسكوّد"

وسكّت يا "كلينتون"

كتمت جوه الحلق "بوووه"

والحلم كان آخر مداه هيلا هوبّ

ضربت كرسى فى الكلوبّ

والحلم كان آخر مداه هيلا هوبّ

قربت أطب الواد  "كلينتون" من قفاه

د النخل لاقرع اشتهاه

والقطن لاحمر إتلفاه

من شرخ حيطه فى جوف قريبى

يا شمس غيبى ..

وانشرى هلاهيل أبويا على الضباب

حوشى الفتيته من التراب

انا اولى بيها من الكلاب اليعّربانى

ومن الكلاب الأم..........

لايميها يا بغداد

انا واد جبان ضد ومع

انا إممممممممّعه

وباقول ف وقت الزوّبعه

-كداب كلام كل الأغانى والشعر والشُعره

لا البقره طلعت يوم على الشجره

ولا يوم نزلّى وش البت م القمره-

فبلاش مغالطه وأونطه

بطلى تكاكى

أنا مش هقول وراكى كاك

كاكى ...

وكفايه خالص لما واحد مننّا

ع الكتف يلبس ,شاره سوده يوم حداد

فات الميعاد

وكل عام وانتم بُعاد

وسلام يا ست.

شعر: حمدى حسين