دام برس

قصة ولا من قصص ألف ليلة وليلة!!!! (ليلى والذئب...في القرن الواحد والعشرين) الواقعة:في مدرسة من مدارس ريف دمشق- عربين البلد أنا مدرّسة في مدرسة من مدارس ريف دمشق,في هذه المدرسة مدير فاضل جدا جدا (نعيم الناعم) أخلاق فاضلة جدا إلى درجة التحرش بالمعلمات! ومن ثقافته العالية لديه جمل وكلمات من الكلام البذيء مايجعله يحتل المرتبة الأولى في هذا المجال!!! حاول التعرض لي فقابلته بالرفض فتأفف من ذلك وبدأت المشاكل! لست الأولى ولا الأخيرة من تم التحرش بهم ولكن هناك من المعلمات من خضع للأمر الواقع لكي لا تطرد من المدرسة أو يتم توقيف راتبها كما حصل معي!!! طبعا بالإضافة إلى الفوضى في الصفوف والإدارة وبعض المعلمات يلي قاعدة على طرف كنباية المدير وعم يتغزّلوا ببعض والطلاب مكيفين لا في درس ولا شي وأهم شي الضوضاء والإزعاج لغير دروس!!!ويلي عم تشتغل كنزة صوف ويلي عم تاكل بوقت الدرس!!! المهم جاييتكم بالحكي ,مرق أول شهر بدون راتب قلت مو مشكلة أنا جديدة(مؤقتة) وقراري ما إجى لسى! ثلاثة شهور ومافي راتب!!!(اسمك سقط سهوا!!!على حكي المدير)مافي اسم إلي بالجدول هيك راحت القصة سبعة شهور وكلو لأنو ما رضخت لأمر المدير الفاضل!!!لأنو ما رفعولي إسمي!!! راتب ما في و حركشة دائمة!!! نسيت إحكيلكون عن وجبات الكريسبي والكوردون بلو بالإدارة وكلو هاد عندي دلائل عليه مصوّرة!!! قلت خلص هي الحالة ما عاد ينسكت عليها لازم نصلّح الوضع مشان جيل المستقبل يلي مالهم أي ذنب بهالشي يلي عم يصير ومشان المعلمات يلي عم يتحملوا كل هي الضغوط مشان ما ينحرموا من لقمة العيش!!! رحت على مديرية تربية ريف دمشق وكالعادة اكتبي شكوى وحطي طوابع وسجليها بالديوان وخدي رقم الشكوى ونامت القصة شهر زمان وعلى اتصالات وشي يردّوا وشي لأ و وقت يردّا يجاوبوني دغري إنو ما صار شي لحتى حكينا عن طريق أحد معارفنا مع معاون مدير تربية ريف دمشق صار الكل يركض وما يلحق! لك استقبالهم صار غير شكل المهم القصة ما طلع منها شي والمعرفة ما نفعتني بشي!!!! طبعا في بالمديرية الأستاذ لورانس الله يعطيه العافية ما قصّر بشي ساعدني واتصل و اشتغل مشان راتبي واتصالات بمندوب المالية المحترم(الأستاذ عبد الحكيم) مشان المدير الفاضل لقيت ما في تجاوب فقررت اشتكي للوزارة ذهبت إلى الوزارة ونفس الروتين شكوى,طوابع و ديوان(رقم الشكوى موجود)وصورة عن الهوية(رقم الشكوى 8267/ع) كتبت الشكوى ورحت لعند مدير الرقابة وحكيت له وقلت له إنو بالمديرية ما في استجابة! وسألته قدّم الشكوى ولا ما في داعي ما حدا رح يقيمها من أرضها؟! جاوبني: له كيف؟؟؟!!!!! وقال لي قدمي الشكوى ولنشوف بدهم يشتغلوا ولا لأ؟! بدي فرجيهم كيف ما بدهم يشتغلوا!!!! المهم وبلا طول سيرة تحوّلت الشكوى على مديرية الريف(بعد مرور شي أسبوعين) واستدعاني مدير الرقابة على ما أذكر اسمه الأستاذ عمار عبيد المحترم وحقّق بالموضوع وشرحت له الموضوع وسألني: قبضتي الرواتب تبعك( كنت قبل بيوم قابضة كل الرواتب مع تهديد المدير الفاضل بأن يتسبب لي بالمشاكل إذا لن أسحب الشكوى!!!) الأستاذ مدير الرقابة بمديرية ريف دمشق عرف إني قبضت الرواتب طنّش على باقي الموضوع!!! و وقت قلتلو إنو هيك هيك بالمدرسة وهيك صار معي! قلي: نحنا سألنا عن المدير وهو منيح كتير وهاد شي ثانوي!!! قلت له طيب بصير هيك يعمل(مع العلم إنه بالشكوى مكتوب كل شي بالتفصيل الممل)؟فقال لي: هي شغلة شخصية ونحنا منحكي معه و منسأله(طبعا شخص مثل المدير أكيد رح يحكي الصراحة ويأكّد الحكي على حاله)!!!(قالولوا للحرامي حليف يمين!قلهم إجاني الفرج!), مع العلم إنو حكيت لمدير الرقابة كل شي بالتفصيل الممل ولو إنو هاد الشي صاير مع ابنته لكان قلب الدنيا فوقاني تحتاني بس مشان شو؟لا بنتو ولا بخصّو!!!!مواطنة من هالمواطنين شو بدنا فيها؟!!!!و قلت له أنا مستعدّة لمواجهة المدير وجها لوجه!!!! وطلب منّي شهود وعطيته أسماء الشهود و أرقام تلفوناتهم(طبعا و إلى الآن لم يتم استدعاء أحد منهم رغم مرور شهرين عالمقابلة) طبعا صرت اتصل مشان أعرف شو صار بالقصة ما في أي رد والدخول ممنوع بدون موعد مسبق لأنو الدخول لعند مدير رقابة مديرية ريف دمشق أصعب من الدخول لعند الوزير نفسه!!!!حاجب الوزير-وزير!!!! فقررت إحكي مع مدير التربية وصار لي شهر أتصل و يرد عليّ مدير مكتب مدير التربية يلّي ماعنده إلا جواب واحد(عنده اجتماع) ما كانو يخلصو هالإجتماعات!!!! وعلى حد علمي إنو لازم يكون يوم من الأيام لاستقبال المراجعين! ولا هاد الشي بس حكي!!! وطبعا كان يرد مدير مكتب مدير التربية (الأستاذ رامز عيد المحترم)على ما أذكر بنبرة حادّة مع عدم رغبة في التكلم وأخر محادثة قلت له السيد الرئيس نادى بالإصلاح وإنتو مطنشين من وين بدو يصير الإصلاح إذا عندنا هيك موظفين لك آخخخخخ لو الرئيس بيعرف بهيك موظفين!!! كان الرد ما يأتي: شو جاي تعطيني محاضرة؟؟؟؟!!!!!! طبعا و إلى الآن المشكلة بدون حل الشهود لم يتم استدعائهم المدير الفاضل على رأس عمله وطبعا بعتلي خبر المدير إنو ما رح يطلع شي من القصة و من الشكوى(بحكم الصداقة بينه و بين مدير الرقابة)!!!! وأنا ضلّيت بدون شغل وبدون حل لمشكلتي والمعلمات إلى الآن متحملين تصرفات المدير!!! ملاحظة: في آنسة من الآنسات ما رضيت تشتكي على المدير لأنو المدير من نفس المنطقة و بيعمل لها فضيحة بين أهل المنطقة لأنو قبل هالمرة صاير هاد الشي!!!! محتارة!!الواحد ياخود حقه بإيدو ممنوع وما بصير ينزل مستواه لمستوى هيك عالم عديمة الأخلاق!!!والقانون ما عم ياخدلنا حقّنا(قانون الغاب هو الشغّال يلي عندو واسطة أو فيتامين و بيمشي حاله والباقي على الله- ينمحقواااااا)!!!!و ما في احتمال ثالث!!! شو بيعمل الواحد؟؟؟!!!! النهاية: وين المسؤولين, وين الإصلاح, هيك بدنا نضل أيمت أنا بدي أخذ حقّي؟ولا خلص راحت عليّ؟ عم انتظر كمان شوي لشوف شو آخرتا؟ عم فكر رد ارجع وقدم شكوى للوزير و للرقابة المركزية شوي شوي لفوق بركي حدا بيستجيب للشكوى تبعي!!!!! الله يكون بعون يلّي ما عنده واسطة!!!!بروح حقّه و راتبه كمان!!!!ومن هالناس كتير

هذه المعلومات وصلتنا إيميل من مدرسة تسمى لول