Logo Dampress

آخر تحديث : الخميس 28 آذار 2024   الساعة 21:37:24
دام برس : http://alsham-univ.sy/
دام برس : http://www.
الحلقة الثالثة من ألو دكتور : ألو الدكتور سامر.. أهلا بالشب .. معاك الدكتور سامر .. مستعدون لتقديم أية استشارة طبية ... يقدمها لكم نخبة من الأطباء .. فاكس 3311565

-        ألو.. الدكتور سامر...

-        أهلاً بالشب.. من زمان ما حكى معانا شب.. ما شاء الله مرضانا كلون كبار بالسن...

-        والله يا دكتور مشكلتي مشكلة..

-        شو عم يوجعك يا إبني..؟؟

-        عم يوجعني راسي... وعيوني.. وبطني... وركبتي,,,

-        أوف.. كل هدول..

-        ولسا في كمان يا دكتور بس هدول أكتر شي...

-        امممممممممم.. هلأ فهمت عليك..

-        كيف حاسس حالك...؟؟

-        حاسس حالي نمر...

-        الحمدلله كتير منيح..

-        لاء دكتور فهمتني غلط.. حاسس حالي مخطط

-        ليكون قصدك حمار الوحش...

-        مزبوط يا دكتور حاسس حالي مخطط بالأبيض والأسود.. وكلمالها الخطوط السودا عم تكتر والبيضا عم بتقل...

-        احكيلي يا ابني.. حاسس حالك حزين؟؟

-        لاء شو حزين.. كل الأمور تمام....

-        يا ابني لازم تفتحلي قلبك لأقدر ساعدك...

-        مزبوط دكتور أنا كتير حزين...

-        ماني رح أسألك ليش حزين.. لأنو الأسباب بكتير من الأحيان ما بتكون مهمة... نحنا يا ابني ما منحزن بسبب شي محدد.. نحنا مِنْفَرِّغْ كميات الحزن اللي اجتمعت جواتنا بمراحل الفرح..

-        معقولة هيك يا دكتور..

-        أي معقول.. لا تبحث عن سبب حزنك لأنك بكتير من الأحيان رح تلاقيه ما بيستاهل وهادا الشي رح يزيدك حزن فوق حزنك... لأنك ما بتعرف أنو هالحزن اللي بتشعر فيه هو عبارة عن الشعرة الأخيرة التي قصمت ظهر البعير...

-        لكن عن شو بدي دور دكتور..

-        خبرني... بعدك عم تلاقي متعة بأداء هواياتك والشغلات اللي بتحبها..

-        لا والله يا دكتور.. كنت أطلع مع رفقاتي عالقهوة وعلى مشاوير بس هلأ ما عاد حبيت.. حتى كرة القدم يلي كنت أستمتع بالتفرج على مبارياتها هلأ بطلت..

-        طيب حاسس شي بالذنب... حاسس أنك قصرت بشي أو أذنبت بشي..

-        أي والله يا دكتور بس المشكلة أني مو عرفان ليش أنا حاسس بالذنب...

-        مو مشكلة يا ابني.. هادا الشعور ممكن يصير بمتل حالتك.. اختلف النوم عليك شي..؟؟؟

-        والله يا دكتور أيام بفيق كتير بكير الصبح وأيام بحس حالي بدي نام النهار كلو...

-        كيف حاسس همتك وطاقتك...؟؟

-        طاقتي مسكرة يا دكتور وهمتي عدم...

-        أنت بتدرس ولا بتشتغل...؟؟؟

-        أنا نجار يا دكتور..

-        والنعم يا سيدي.. بس كيف حاسس تركيزك على شغلك...؟؟

-        والله يا دكتور ما في تركيز منوب.. من كم يوم كنت رح روح أيدي بالمنشار.. ومرة بالبسمار..

-        بدي تدير بالك يا ابني وتوقف شغل بهالفترة...

-        بس دكتور أنا عم عيل عيلة كيف بدي وقف شغل..

-        يا ابني إذا عيلتك خسرتك أصعب بكتير من أنها تجوع شوي..

-        ماشي دكتور..

-        كيف شهيتك على الأكل وعلى الجنس..

-        والله يا دكتور ما في شهية لا هون ولا هون...

-        هلأ بدي أسألك سؤال بس ما بدي ياك ما تفهمني غلط..

-        تفضل دكتور..

-        في شي مرة فكرت أنك تنهي حياتك وتنتحر..؟؟؟

-        لاء أعوذ بالله الانتحار حرام دكتور بكل الأديان والمعتقدات...

-        بعرف يا ابني بس خلينا نفترض أنو الانتحار مو حرام.. كنت بتنتحر؟؟؟

-        بصراحة.. لو الانتحار مو حرام ما كنت شفتني قاعد قدامك اليوم.. كنت من زمان ساويتها بس الحمدلله أنو حرام.. بس دكتور ممكن أسألك شغلة..؟؟

-        تفضل..

-        يعني من مقالاتك الماضية فهمنا أنو يلي بيجعو بطنو لازم نسألو عن الغثيان أو لعية النفس والإقياء وهالأمور... وأنت من الصبح قاعد عم تسألني على شغلات مالها علاقة..

-        مظبوط لأنو بحالتك يا ولدي وبسبب تعدد الشكاوى يلي مالها علاقة ببعضها استنتجت أنو مشكلتك نفسية مو عضوية..

-        نفسية !!!!!!!!!!! شو قصدك دكتور يعني أنا مجنون..

-        لا يا ابني والعياذ بالله.. أنت بتعرف أنو الإنسان مقسم لجسد ونَفْسْ وروح... هلأ الجسد بينصاب بالأمراض الجسدية يلي نفختلكون قلبكون فيها بالمقالات الماضية والروح من علم رب العالمين وما منعرف عنها شي .. صفيت النفس.. والنفس ممكن تمرض متل الجسد.. يعني متل ما ارتفاع حرارة الجسد بيعمل حمى.. ارتفاع حرارة النَفْسْ بيعمل قلق وأمراض القلق.. ومتل ما في خلايا شاذة بالجسد بتنمو بسرعة لتعمل سرطان.. في أفكار شاذة بالنفس بتنمو بسرعة لتعمل مرض اسمو الفصام... ومتل ما في كريب بيصيب  الجسد وبيسبب التعب والوهن في كريب بيصيب النفس وبيسبب تعب النفس ووهنها وما يسمى بالاكتئاب.. والمريض يلي عندو اكتئاب ممكن يصير عندو آلام متنوعة بالجسم بدون الوصول لسبب منطقي لألها..

-        دكتور بفهم من كلامك أنو أنا عندي اكتئاب..

-        والله من الأعراض يلي وصفتها بيكفي 3 أو 4 أعراض من أصل يلي سألتك عنهون لنقول أنو الشخص عندو اكتئاب بشرط تستمر الأعراض أكتر من أسبوعين..

-        طيب دكتور.. شو بتنصحني أعمل...

-        والله يا عزيزي لازم تشوف طبيب نفسي ليوصفلك دوا للاكتئاب وأصحا تاخود هيك أدوية لحالك لأنو إلها مضاعفات إذا اتاخدت بطريقة غلط...

-        والأوجاع دكتور.. ؟؟

-        بتروح لحالها لما تاخود الدوا.. بس طبعاً الدوا بدو  شي أسبوعين لحتى ياخود مفعولو ويحسنلك مزاجك..

-        ولازم آخود الدوا على طول دكتور..

-        على الأغلب لاء لأنو المرض بيجي لفترات محددة وبيروح بعدين...

-        طيب دكتور من شان الأفكار الانتحارية.. معقول تتطور الأمور وقرر فعلاً الانتحار..

-        بصراحة في عبارة بقولها أنا واللي هية..( إن اتخاذ القرار بالموت أسهل بكثير من اتخاذ القرار بالحياة... ) بس بنفس الوقت أنا بقول أنو ( إن اتخاذ القرار الأصعب يجعلك تعيش الحياة الأسهل..)

-        شكرا لألك دكتور كلامك كتير ريحني.. وأنا هلأ رح ألبس وروح عند الطبيب النفسي..

-        انشالله بيكون الشفاء على إيديه,,, موفق...

 

                  د. محمد سامر آغا 

 

اقرأ أيضا ...
تعليقات حول الموضوع
  0000-00-00 00:00:00   A
اي والله لحسن حظنا انا طلاب عند الدكتور سامر الله يوفقك ما شفت أفهم منك
طالبة قلمونية  
  0000-00-00 00:00:00   طالب قلموني
من حسن حظي أنو أنا طالب عند الدكتور سامر
q  
  0000-00-00 00:00:00   معلومات
بحب اشكرك دكتور سامر يلي بتوصللنا المعلومة بطريقة مميزة بتفسرلنا كتير من الاشياءيلي منتعرض لها بحيا تنا وياريت تعطينا بالحلقة الجاية عن طريقت معا ملة لاطفاال يلي بعانو من الامتحانات وبشكوا انهم مو دارسين مع انهم من المتفوقين ونحن بأنتظار كل جديدك
رانيا اللحام  
هل ترغب في التعليق على الموضوع ؟
ملاحظة : جميع التعليقات المنشورة تعبر عن رأي أصحابها ولا علاقة لموقع دام برس الإخباري بمحتواها
الاسم الكامل : *
المدينة :
عنوان التعليق : *
التعليق : *
*
   
دام برس : http://sia.gov.sy/
دام برس : https://www.facebook.com/Syrian.Ministry.Culture/

فيديو دام برس

الأرشيف
Copyright © dampress.net - All rights reserved 2024
Powered by Ten-neT.biz