Logo Dampress

آخر تحديث : الأربعاء 04 آب 2021   الساعة 02:48:44
الرئيس الأسد يصدر المرسوم رقم 206 للعام 2021 القاضي بتكليف السيد المهندس حسين عرنوس بتشكيل الوزارة في الجمهورية العربية السورية  Dampress 
دام برس : http://alsham-univ.sy/
دام برس : http://www.
ألو..... دكتور ... تفضل.. معاك الدكتور سامر .. مستعدون لتقديم أية استشارة طبية ... يقدمها لكم نخبة من الأطباء .. فاكس 3311565

ألو..... دكتور... (1)

 

 

 

 

-        ألو... دكتور...

 

 

-        تفضل.. معاك الدكتور

 

 

-        صدري عم يوجعني يا دكتور...

 

 

-        ولي على آمتي عليك..

 

 

-        سلامة آمتك يا دكتور.. مشان الله إللي شو أعمل...؟؟

 

 

-        طيب أول شي أنت أديش عمرك..؟؟

 

 

-        شو بدك بعمري.. عم أتصل لتعالجني ولا لتخطبني..

 

 

-        يا بني آدم, ألم الصدر عند الناس بأعمار أكتر من أربعين عند الرجال وخمسين عند النساء بيدل بمعظم الأحيان على مشكلة خطيرة لازم يراجع المريض مشانها الأسعاف مباشرة لأنو مشكلتو ممكن تكون نقص تروية قلبية.. أما الأعمار الأصغر فغالباً المشكلة أقل خطورة..

 

 

-        ولييي.. أنا عمري خمسين... ورجال وحياتك..

 

 

-        طيب خبرني كيف شكل الألم..

 

 

-        شكلو مُرَبَّع.. مدري مدور.. شو يعني شو شكل الألم.. ليش الألم ألو أشكال..

 

 

-        طبعاً.. الألم اللي بيحس فيه المريض بشي ضاغط على صدرو.. يعني كأنو صخرة على صدرو هو ألم نقص تروية قلبية... بينما الألم الناخز فبيدل عادةً على أسباب أقل خطورة متل ألم تشنج الكولون أو تشنج عضلات الصدر.. الألم الحارق بيخوف كمان ولازم المريض يراجع مشانو الإسعاف فوراً.. على الرغم من أنو بمعظم الأحيان بيطلع ألم سببو شي خارج القلب.. متل التهاب التامور واللي هوة القشرة المحيطة بالقلب أو التهاب الجنب واللي هية القشرة المحيطة بالرئة. الألم الجارح بالصدر هو على الأغلب ألم التهاب قصبات.. لازم يكون كل واحد فينا حس فيه ولو مرة بحياتو لما التهبت قصباتو.. طبعاً هادا ما بيخوف..

 

 

-        دكتور.. أنا ألمي ضاغط.. حاسس كأنو فيل قاعد على صدري...

 

 

-        طيب خبرني.. وجعك عم ينتشر..

 

 

-        والله لما طلعتو من الغسالة كان الجو مغيم فما نشرتو.. شو يعني عم ينتشر؟؟ حاكيني على قدِّي ربي يخليك يا دكتور..

 

 

-        يعني الألم عم يروح لأيدك اليمين أو اليسار أو لرقبتك..

 

 

-        أي والله يا دكتور وحاسس بوجع مع نمل بأيدي اليسار ووجع برقبتي كأني رح أختنق..

 

 

-        والله هادا دليل تاني على أنو الألم قلبي.. بس أحياناً ألم المناقير الرقبية والديسك الرقبي ممكن كمان ينتشر على الأيد والعنق مع خدر ونمل بس عادة بدون ألم بالصدر... بس لا تقلي أنو عندك غثيان أو أنك عم تعرق عرق بارد وغزير...

 

 

-        مبلا.. عندي...

 

 

-        شوف.. ألمك يبدو قلبي مشان هيك رح أتصل فوراً بالأسعاف.. فتاح باب البيت واتصل بحدا من أهلك أو شوف حدا من جيرانك يبقى جنبك.. وخليك قاعد ومرتاح بدون توتر حاول تاخود نفس عميق وتسعل سعلة قوية لبين ما تجي سيارة الإسعاف.. إذا حواليك حدا عندو القلب خود من عندو حبة ( نتروغليسرين) وحطها تحت لسانك بدون ما تبلعها.. وإذا حواليك حبة أسبرين خدلك نص حبة من الأسبرين اللي حبتو كبيرة أو حبة من البيبي أسبرين وامضغها قبل ما تبلعها.. وأهم شي تحافظ على هدوئك..

 

 

-        دكتور لو أني كنت تحت الأربعين بشو كنت فكرت..؟؟

 

 

-        ساعتها كنت دورت إذا عندك شي عامل خطورة متل أنو يكون عندك سكري.. أو ارتفاع بالضغط أو عندك قصة عائلية لأمراض قلبية.. أو عندك مرض قلبي سابق مثلاً.. أو أنك بدين أو مدخن سيجارة أو أركيلة.. أو عندك شي قصة لخثارات أو جلطات قديمة وين ما كانت.. أو إذا في قصة ارتفاع بشحوم الدم عندك أو بالعيلة.. هادا كلو رح يخليني خاف وأبعتك على الإسعاف مباشرة.. حتى ولو كان عمرك صغير.. لأنو الألم الصدري عند ناس عندها واحد أو أكتر من عوامل الخطورة اللي ذكرتها بيخوف ولازم المريض يراجع مشانو الإسعاف مباشرة دون تردد أو تذمر..

 

 

-        طيب وإذا كان المريض أصغر من 40 سنة عند الرجال وأصغر من خمسين سنة عند النساء وما كان عندو ولا عامل خطورة من يلي حكيتون وصار عندو ألم صدري فشو يساوي...

 

 

-        ليك.. إذا كانت صفات الألم ضاغط وبينتشر للذراع اليسرى أو العنق أو مترافق مع غثيان أو تعرق أو دوخة فالأفضل أنو يراجع الإسعاف مباشرة ودرهم وقاية خير من كفن السمداج...

 

 

-        ولي لهالدرجة.. طيب وإذا ما كانت صفاتو هيك..

 

 

-        هادا ألم صدري غير نموذجي.. ممكن المريض يراقب حالو بوجود حدا من الأهل معو ممكن يجرب بعض المسكنات وينتظر فترة قصيرة لا تتجاوز الساعتين إذا ما خف الوجع فلازم يراجع طبيب بأسرع وقت.. نسيت قلك أحياناً الأزمات القلبية بتجي بدون وجع بس على شكل لهتة (تسرع بالتنفس) حتى وهو المريض مرتاح.. مشان هيك يلي عندون عوامل خطورة أو عمرون كبير لازم ينتبهو لهالأعراض ويراجعو مشانها الإسعاف.

 

 

-        طيب دكتور وإذا ما......  هه أجت سيارة الإسعاف.. بتوصينا شي دكتور من العناية المشددة.. أمانة...

 

 

-        سلامتك عيوني.. سلملي على الكادر الطبي وخاصة الممرضات.. وخليك طول الطريق عم تاخود نفس عميق وتسعل.. الله معك...

د : محمد سامر آغا

 

اقرأ أيضا ...
تعليقات حول الموضوع
  0000-00-00 00:00:00   الو..شكرا الك
حدث في مثل هذا اليوم..عبارة لن تعد تشد آذهاننا وتصغي لها آذاننا ....انما يحدث في كل يوم ..مع دكتورنا وشاعرنا سامر آغا ..ادركنا من خلال تواصلنا المستمر مع الدكتور سامر انه شخص لايعرف الملل ويكره الروتين لذلك لاتندهشو كتير(لانكم لسا ماشفتو شي) حتى ما يصيبكن الم صدري داهش وهذا لايستريح على المسكنات او النتروغليسرين..انما فقط علاجه ان تتابع المزيد عن قراءات الدكتور سامر وتنتهي بك الحالةالى الادمان فتنسى المك وهذا ما يدعى العلاج بالمثل ..اي الداء بالداء
د.حيان بدور  
  0000-00-00 00:00:00   شكر وثناء
جزاك الله خيرا يا دكتور سامر على ها المقال الحلو (( ثابر وإلى الأمام ... )) , ونحن بانتظار مقالاتك الجديدة ان شاء الله .
عدنان  
  0000-00-00 00:00:00   thanx
great new style ... but it.s not strange when u know the source .....great dr.samer .... thanx i will post it on my profile :)))
omar  
  0000-00-00 00:00:00   thanx ur the best Dr samer
thanx u doctor samer really ur amaizing......
alaa  
  0000-00-00 00:00:00   شكر
شكرا عالمناقشة الجميلة لأنو تعلمنا عوامل الخطر لأمراض القلب
سمير  
  0000-00-00 00:00:00   كلمة شكر لدكتورنا العظيم

وبأسلوب سلس و بذكاء براق كعادته يطل عينا الدكتور سامر الذي احببناه كطلاب طب لينشر لنا مقالاته الرائعة و يصعد سلم التميز الذي لا ينتهي ليبرهن لنا أن طموح و قدرات الانسان لا تقف عند حد معين جزاك الله خيرا يا دكتور و بانتظار مقالاتك الرائعة يا مبدع المبدعين طالبك المشاغب المحبوب

بشار  
  0000-00-00 00:00:00   كلمة شكر
من اجمل ما قرات يا دكتور سامر وشكرا لكم على هذا الموقع الجميل واشكر مدام مي على كتاباتها الرائعة وخاصة زاوية اراء
الدكتور ماهر العيسى  
هل ترغب في التعليق على الموضوع ؟
ملاحظة : جميع التعليقات المنشورة تعبر عن رأي أصحابها ولا علاقة لموقع دام برس الإخباري بمحتواها
الاسم الكامل : *
المدينة :
عنوان التعليق : *
التعليق : *
*
   
Copyright © dampress.net - All rights reserved 2021
Powered by Ten-neT.biz