دام برس - وسيم قشلان:

وسيلة تواصل اجتماعي.. بالاحرى هيك المفروض يكون تصنيفو ضمن مواقع الانترنت.. في حال كان تطبيق عالموبايل او موقع عالانترنت صار داخل بأدق تفاصيل حياتنا..
الفيسبوك بدايةً كان حكر على مجموعة من الناس المثقفة تكنولوجياً نوعاً ما.. أما هلأ فصار من الصعب تلاقي مواطن سوري الا ويحاكيك باحدث صورة نشرها أو أجدد حالة كتبها..
عرف يقول اسمو او لا.. المهم يأثبتلك بالدليل الدامغ انو هو عنصر فعال جداً على الموقع الازرق.. وانو مراقب لتحركاتك من خلال المحادثات، التعليقات، اللايكات.. بيقدر يتكهن ايمتى فقت وايمتى نمت.. وشو الخبر يلي لفت انتباهك ودعمتو بلايك.. وازا سألتو شو عم تراقبني؟؟ بيقلك له يا زلمة عم يطلع هالشي بوشي دون قصد!
وهو بيكون فاتح مركز استخبارات عندو لكل خطوة بتخطيها على حسابك، لدرجة بتصير متأكد انو هاد موقع تجسس اجتماعي ومالو علاقة بالتواصل!
ازا رحت على مطعم بتعمل تاغ.. ازا تعينت بوظيفة بتعمل "آت".. ازا حسيت بشي وازا ما كنت حاسس وهي الحالة المعممة عند شبابنا بتحط "فيلينغ" ما بيفهم للتعرف على نفسيتك.. حتى صار فينا نقول صار عنا "سي في" يومي عن حالة كل شب أو بنت عالفيسبوك!!
الطامة الكبرى انك صرت مضطر تجامل رفقاتك وتحطلن لايك تحت حملة "الله جبار الخواطر"، ولا تستغرب أبدا اذا اتصل فيك رفيقك بعد نص ليل او بعتلك مسج وقلك بكل امتعاض " هيك ما بتحطلي لايك على صورتي؟؟ ماشي.. الفيسبوك دين ووفا"..
اي وقف عندك يا حباب.. مين خبرك انو عمك مارك بيعطيك نسبة ارباح اكتر اذا جاب بوستك الخنفشاري أو السيلفي يلي مدري خلف شو اعجابات اكتر؟؟!
ومين قلك انو مضطر حط لايك و ارفقها بتعليق.. يا اخي الدنيا ازواق.. والاعجاب لازمو قبول مني.. وبصراحة ولو فيها وقاحة يمكن تكون مالك عاجبني.. لا انت ولا منشوراتك!
انو معلش يلي زعلت مني لاني ما حطيتلك لايك.. ويمكن كون متقصدها بيكون احياناً عندك علم اني ضايفك عالفيس مجاملة ولو بترجع لالي ما بقبل طلب الصداقة من الاصل، ومتلك متايل !
الأزمة الحقيقية يلي حتخلينا نقلّص قائمة اصدقائنا من رواد "اللايك"، هو زر ال " أن لايك"، هالزر ممكن يعمل مشاكل اجتماعية فيسبوكية، ما انزل الله بها من سلطان، بأى اخي مارك ومتأكد انك ما عم تسمعني، بلاها يستر ع رفيقتك الصينية مدري التايوانية، نحنا شعب مو لابقلنا ديموقراطية!
في عالم كتير منكون مضطرين نقبل صداقتن بحكم القرابة والمخاجلة ، لانو الحمدلله زلمة ما بتشوفو بالعشر سنين مرة، بيصير بدو يضيفك عالفيس بس مشان يراقب تحركاتك؟؟، عنصر سلبي ومحايد لأبعد الحدود، لدرجة تنسى انك كنت ضايفو بيوم من الأيام !
من آخرو يا من تسمعني.. هالتكنولوجيا لبقت لناس وناس.. وانتو خلصت !

إزالة الألغاز!
متلك متايل: هناك كثير من الأشخاص يعبرون عن حالتك.
ما أنزل الله بها من سلطان: مصطلح شعبي، بمعنى لا يقبل بها لا عقل ولا منطق.
لبقت: تليق ببعض الناس.

انتو خلصت: كناية شعبية من مسلسل سوري، وتعني انتهينا