Logo Dampress

آخر تحديث : الجمعة 29 آذار 2024   الساعة 00:45:44
دام برس : http://alsham-univ.sy/
دام برس : http://www.
نقلاً عن الفيسبوك .. صار لازمني زيادة راتب .. سومر ابراهيم
دام برس : دام برس |  نقلاً عن الفيسبوك .. صار لازمني زيادة راتب .. سومر ابراهيم

دام برس:

الساعة الواحدة بعد منتصف الليل

وقف الباص قدام الباب الحديدي العملاق
نزل عزوز من الباص
طلّع من بين قضبان الباب

شوية عالم ضايعة عم تتمشى جوا بدون وجهة محددة
شوية عالم قاعدين عم يشربو شاي بصمت
ولاد عميلعبو
نسوان عميبكو بصوت واطي

اخد نفس عميق و دفش الباب
طلع منو صوت صرير عالي
سكتو كل العالم و طلعو عليه
دخل عزوز و اتجه لعندون
- مسا الخير يا جماعة
تشجع واحد كبير بالعمر و جاوبو
- حضرتك عزوز ؟ وينك تأخرت ؟
- عجقة كتير و ما عملحق والله
- طيب عود شربلك كاسة شاي
- والله مستعجل ، الشغل لفوق راسي
- و لك قعود ، لحقان عالشغل ، وين رح نهرب يعني ؟
سحب عزوز كرسي و قعد مع العالم
- شو الاخبار عزوز ؟
- والله الاخبار عندكون .. كام العدد اليوم ؟
- والله اليوم دسم .. صار شي خمسين واحد لهلق ..
- اففف .. خير ؟ اش صار اليوم ؟
- متل كل يوم .. تفجيرات و هاونات هون ، و براميل و صواريخ هونيك .. كالعادة يعني
- لا حول و لا قوة الا بالله
- رح نوسع معك بالباص ؟
- اذا الولاد بيقعدو بالحضون بتوسعو .. في كتير ولاد ؟
- نصون ولاد ، قصفو مدرستين اليوم ..
- يا حرام .. شو لحقو يشوفو من هالعيشة غير جشعكون و طمعكون و قمعكون و حربكون ؟
- خليك عاقل عزّو افندي .. لا تقعد تحكم علينا من هلق .. لحقانين ، فوق كل واحد بياخد نصيبو
- امرك ...... سكتنا ..
- صحي عزوز ، وينا عصايتك ؟ مو كان عندك عصاية طويلة و نهايتا حادة مقوصة متل السكينة ؟
- المنجل ؟ صرلي سنين ما عمنزل المنجل معي عالشغل .. ما عاد يلزم .. ما شالله عليكون صرتو عمتشتغلو شغلو بالرصاص و القنابل ..
بيقرب ولد صغير و بيصير يشدلّو عبايتو السودا و يقول :
- عمو عزوز عمو عزوز .. وين رح تاخدنا ؟
- لفوق حبيبي .. عالسما
- عالسما ؟ بس السما كلها طيارات وبراميل و هاونات .. شو الفرق ؟
- رح نطلع لفوق كتير لا تخاف .. هونيك رح تلعب و تنبسط متل ايام قبل ، وقت كانت السما حلوة و ما فيا غير عصافير و نجوم
- ايام قبل ؟ انا عمري ٤ .. يعني من وقت ما ولدت السما بتخوف ..
تنهد عزوز و ما عرف شو يجاوبو ..

سكتو الكل
الشجرات عم تتحرك مع نسمات الهوا
و تترك خيالات مرعبة من ضو القمر الخفيف على بعض شواهد المقبرة
صوت حفيف الاوراق
صوت كلب الحراسة من بعيد
صوت رشفات الشاي
يتخللو الهدوء المهيب

طلع حولو عكل هالعالم و انزعج شوي
حس حالو مركوب و عم يستغلو فوق
كل الشغل عراسو
و غلاقة الملايكة عم يسرحو و يمرحو و ما عم يعملو شي
ملاك الحب مثلا شو عم بيخري صرلو سنين ؟
ما عاد حدا يحب حدا بهالبلد و الكل عم يقتل بعضو !

تنهد كمان مرة .. كمل كاستو الشاي بشفة وحدة ، وقام :
- يالله يا جماعة ، بعد اذنكون الكل عالباص ، بدي لحق وصلكون و ارجع انزل . الليلة شكلا حابكة و القصف ما وقف

قامو الكل و اتجهو للباص مباشرة .. و بدون مناقشة
شباب و ختايرة ، جنود من اطراف مختلفة ، مدنيين ، ولاد و نسوان ..
بكل هدوء طلعو عالباص واحد ورا التاني و بدون ما يلقو اي نظرة وراهون
مشهد رهيب و لهلق ما تعود عليه عزوز
من زمان كانو يقاومو .. كانو يرفضو الموت و يتمسكو بحياتون الارضية
كان يضطر يدفشون دفش عالباص و بالقوة
هلق صارو مستعجلين يركبو و يخلصو من هالعيشة و من هالبلد

سكر عزراييل باب المقبرة
و طلع وراه من بين القضبان نظرة اخيرة
خلال دقايق قليلة ، رجعت تعبت المقبرة ضحايا جداد
قاعدين عميشربو شاي و منتظرين عودتو
ايمت رح يخلصو حربون ؟؟
و الله هلكت
الموت تعب من هالبلد
صار لازمني زيادة راتب

الوسوم (Tags)
اقرأ أيضا ...
هل ترغب في التعليق على الموضوع ؟
ملاحظة : جميع التعليقات المنشورة تعبر عن رأي أصحابها ولا علاقة لموقع دام برس الإخباري بمحتواها
الاسم الكامل : *
المدينة :
عنوان التعليق : *
التعليق : *
*
   
دام برس : http://sia.gov.sy/
دام برس : https://www.facebook.com/Syrian.Ministry.Culture/

فيديو دام برس

الأرشيف
Copyright © dampress.net - All rights reserved 2024
Powered by Ten-neT.biz