دام برس:
بتعرفوا كنت مبسوط كتير بالسهرة الليلة .. وخاصة اني سهران مع جنود ابطال ..
انا مش بس سياسي واعلامي انا بالاساس كنت احمل بارودة وشاركت بمعارك وقتال يمكن اكتر من اي واحد عم يقرا كلماتي .. وهيدا فخر بحملو وبشوف حالي اني مقاوم ما انحنيت ولا ركعت كل حياتي .. كنت قاتل كرمالكم .. وبكل فخر بقدر قول اني بحياتي ما اطلقت النار إلّا بالتدريب او بمعارك مع جندي اسرائيلي او مع عملا اسرائيل .
بكل الصدق كنت مبسوط واحساس كتير حلو بيتملكني وخاصة اني بعرف انها سنة النصر انشالله لسورية وشعب سورية ..
بالمحل اللي سهران فيه كان في ابطال عم تطلق النار وبكل شراسة على قوة عدوة كانت عم تحاول تتسلل بضواحي الشام ..
رصاص وقدائف وكنا عم نضحك .. ابطال عم تضحك ..
تألّمت كتير وانا عم اسمع صوت رصاص من اماكن بعيدة عن خطوط النار وخطوط الشرف ..
تألمت كتير بس عرفت إنو بكل المناطق السورية كان في اشخاص عم يقوّصوا رصاص بالسما احتفالا بالسنة الجديدة .. بالسنة ( الشرطوطة ) الجديدة ..
مش رح احكي معك كلام وسخ ولا رح اكتب اي اساءة إلك .. ولا رح اكتب كلمة ( عيب ) ..
بترجاك .. احترم جندي واقف عم يحميك ..
احترم روح شهدا راحت وهيي عم تحميك ..
احترم ام وبي وزوجة وابن شهيد ..
احترم وطنك اللي ما انحنى ..
بترجاك ما بقى تطلق نار بالهوا ولا باحتفال ولا بوداع شهيد ..
خبّي رصاصك لعدوك .. لعدو وطنك .. لعدو شعبك واهلك وعيلتك ..
نحنا شعب ما منحتفل ..
نحنا شعب ما بيطلق نار بالهوا ..
نحنا شعب غير .. لأنو سورية غير .. ولأنو انتي يا سوري لازم تكون غير ..
غيرتك على وطنك وعلى شعب بلدك واحترام لروح شهدا راحت كرمالك .. كرمال تبقى عم تضحك .. بس ما عم تضحك على وطنك ..
كرمال سورية .. ما بقى تقوّص بالهوا ..
كمال فياض
