دام برس- متابعة : هاني حيدر:
أكدت الفنانة السورية سلاف فواخرجي أنه يجب أن نتعامل بجدية أكبر مع الكارثة البشرية الحالية التي اسمها كورونا ، بعيداً عن نظريات المؤامرة وتحليلها وتفنيدها، وأن الكارثة التي نعيشها أمر واقع ولا يمكن أن نغض بصر عنه ولا نتكبر عليه حيث أنه كل يوم أمام عيوننا ينصاب ويموت عشرات ومئات أحياناً بكل العالم.

وقالت فواخرجي في منشور على صفحتها الشخصية على الفيس بوك :"مو عيب نخاف ، وبالوقت الحالي شجاعة أنو نخاف ، ومسؤولية أنو نخاف ، ووعي وثقافة وعاطفة كمان، طبعاً أكيد مو لدرجة الهلع، كرمال نعرف نتصرف بعقلانية وبحكمة، وماحدا يقول أنا مارح أثر ، كل شخص فينا بيأثر ، وكل واحد فينا مسؤول لانقاذ حالنا وانقاذ عيلنا وغيرنا واللي منحبهم واللي مامنحبهم".
 وأضافت النجمة السورية "كلنا سوا حالياً بمركب واحد ، يابننجو يا بنغرق، ويا منقود السفينة بهدوء وببطء وبعقل وبتروي، ولو طال الطريق شوي ، يا بنقود بسرعة وبجنون وبرعونة والكل بروح ... ببساطة".

وتابعت فواخرجي "بنفس الوقت ... الكارثة البشرية التانية هي الحالة الإقتصادية اللي تجمدت نتيجة تعليق كل شي بالحياة ، صحيح صحياً القعدة بالبيت لصالحنا بس معيشياً الوضع أصعب من كل الحكي، ومن الشجاعة والأخلاق نساعد بعض ونحس ونكون لبعض، مارح نعمل تحديات ومارح نتصور ونعلن، الكل لازم يساعد بدون استثناء، واجب الدولة أكيد بالمطلق،
بس أنا عم أحكي عن واجبنا الاجتماعي نحنا اتجاه بعض ، اللي معه كتير واللي معه شوي، لانو اذا مامتنا من الكورونا رح نموت من الجوع ومن الذل ، طالما معظم الأمور الحياتية وقفت لأجل غير مسمّى، والموت بالمرض بهيك حالة اهون من الموت بذل، لهيك يمكن متل ماعلمتنا الكورونا نكون أشخاص جيدين التصرف والسلوك والنضافة كمان كارثة الكورونا عطتنا فرصة نعيش إنسانيتنا المفقودة ، والوقت هلأ كتير مناسب لنرجع بشر، نحمي حالنا وولادنا وغيرنا من المرض ، من الجوع ، من العازة والاحتياج".

وأوضحت: "قدمنا وعم نقدم ولازم نقدم أكتر بدون تحديات وبدون تحديد أرقام وأعداد، وكل شي وأقل شي منقدمه بيفرق عند كتير ناس، إذا اعتبرنا الوباء غضب من ربنا، فالإنسانية هو عطاء ربنا اللي لازم نمارسه حالياً وبقوة وبشجاعة، وما حدا يقول أنا ما دخلني.. كلنا دخلنا.. والإيمان المطلوب هو إيماننا بحالنا لنطلع من هالأزمة على خير بأقل خسائر ممكنة، والله رح يكون معنا لأنه منكون عقلنا وتوكلنا، العقل ثم التوكل".
من ناحية ثانية، تحدثت فواخرجي عن تجار الحرب والأزمات، فأشارت إلى أن أولاد بلدنا اللي ما بيعرفوا الله بسلوكهم وأنانيتهم من تجار الحرب والأزمات، هدول نهايتهم وخيمة، ولا عندهم رادع ولا أخلاق ولا قانون، وما عم يكون في فائدة من القرارات الحكومية، ولا حل للغلاء اللي عم يكوي البشر، وكل شي عشناه حرب وتبعات حرب وكل شي تحملناه إلا هدول مالهم حل، ومؤسف إنو مالهم حل".
ودعت هؤلاء الناس إلى مخافة الله قائلة: "بس دعوة بسيطة جداً انو خافوا الله اللي بتمارسوا عبادتكم إله ظاهرياً فقط واعتبروا أولادكم مكان كتير ولاد مو قادرين ياكلوا واحد بالمية من المنتجات اللي بتبيعوها أكتر من حقها بكتير وأكبر من قدرة معظم السوريين، اتقوا الله بأولادكم عالقليلة".
وأشارت فواخرجي إلى أننا "رح نلتزم ببيوتنا ورح نكون واعيين، بس لازم نساعد بعض بالدرجة الأولى، الوضع موجع، وما حدا فينا ضامن شي لبكرة، والدنيا دين ووفا، لما منمد إيدنا اليوم لحدا، بكرة رح تنمد أكتر من إيد إلنا لما منحتاج، والدنيا دوارة".
وفي ختام حديثها وجهت تحياتها إلى عمال النظافة العظماء "اللي عم يخلوا بلدنا دائماً نضيفة بالحرب وبأصعب الظروف، وبالوقت الحالي اللي بيتطلب أكتر من أي وقت نظافة وتعقيم وحفاظاً على صحتنا كلنا، تحياتي لكل سوري عم يقوم بمهامه وعمله الاضطراري بالظروف الصعبة هي "، كما حيت كل شخص شريف واعي وفعّال ومسؤول ومدرك للي عم نمر فيه".