Logo Dampress

آخر تحديث : الجمعة 29 آذار 2024   الساعة 14:36:32
دام برس : http://alsham-univ.sy/
دام برس : http://www.
ظريف وأبو عجاج... مرسحية آعلية من 4 فصول ..بقلم أبو عجاج
دام برس : دام برس | ظريف وأبو عجاج... مرسحية آعلية من 4 فصول ..بقلم أبو عجاج

دام برس

ظريف وأبو عجاج...بقلم أبو عجاج .. مرسحية آعلية من 4 فصول
الفصل الأول:
ـ مالك بالعادة أبو عجاج كنا نوصل لهون وصوتك يلعلع بيؤغنية عبد الوهاب عندما يأتي المسا ونوجومو الليلي بالسما
ـ عندما يأتي المساء، ونجوم الليل تُنْثر... يا دابة... عندما يأتي المساء، ونجوم الليل تُنْثر
إسألوا لليل عن نجمي، متى نجميَ يظهر
عندما تبدو النجوم في السما، مثلَ اللآلئ
إسألوا هل من حبيبٍ، عنده علمٌ بحالي
ـ آ  يا ويلي... يا ويلي على حالي
كلُّ نجمٍ، راح في الليل بنجم يتور
غيرَ قلبي، فهو ما زال، على الأفقِ محيَر
يا حبيبي، لك روحي، لك ما شئت وأكثر
ـ سلامة ئلبك وسلامة روحك يا أبو عجاج انشاء الله لعدوينك...كفّي
إنَّ روحي، خير افق فيه أنوارك تظهر
ـ روح ئلبي انت يا أبو عجاج
كلَّما وجَّهتُ عيني نحو لمَّاح المحيَّا
ـ الله حييو هادا لمّاح المحيّا
لم أجد في الأفقِ نجماً واحداً يرنو إليَّ
ـ خسا وألف خسا يا أبو عجاج
هل تُرى يا ليل أحظى منكَ بالعطف عليَّ
فأغني وحبيبي، والمنى بين يديَّ
ـ يسلم تمّك يسلم تمك يا ابو عجاج... يعني حتى البغل شد حيلو يالله رح نوصل عل بايكة
ـ ولك ظريف
ـ نعمين ابو عجاج
ـ لئيمتا رح نتم على هل حالة ؟
ـ أنو حالة ؟
ـ رجعتنا علبيت وما معنا حق عشوة والخزكار عل طنبور ما بعنا منو شي ومو بقيان شعير للجحش اللا ئدر نتفة
ـ سيدي بوكرا منبيع الخزكار والله كريم ومشان الجحش خلينا نمروق على بسطة البطيخ يللي براس الحارة مناخدلو كم بطيخة كسر وشوية قشر يتعشى فيهون ومنخللي الشعيرات لبوكرا!
ـ بتعرف ولك ظريف
ـ شو أبو عجاج؟
ـ لازم نغيير المصلحة
ـ والله يا أبو عجاج آل الحجر الثابت بمطرحو قنطار خلينا على حالنا اللا والله يفرجها... يعني جربنا نشتغل بئناني الاسكيجين وصرنا ندور عل كاراجات بس راحو نئلو الكراجات لبرات البلد وصارت الكاراجات بعيدة وحاولنا نروح نبيع المستشفيات فشفت شو صار معنا آل بيستعرروا فينا لأنو معنا بغل! وتمموا يزنوا حتى شتلئ البغل وحرد وما عاد بدو يمشي خطوة وراسوا وألف سيف ما رضي حتى ركببتو علطنبر وشدديت فيه عل زريبة وانت كففيت مغيب يا ابو عجاج وصارت الناس تضحك عليي... اشتغلنا ببيع الماظوط فنفئد المازوت وبالكاز فصار سعر تنكة الكاز بسعر تنكة البانزين فحوولنا على بيع صابون الغسي والصانطورو فبطلت العالم تشتري منا لأنو أبن الحرام أبو ممدوح خلطلنا الصانطورو بالرمل الأبيض ونزع سمعتنا الله لا يوفقو... واشتغلنا ببيع البردئان والكريفون فطلع البردئان والكريفون يللي عل وش ماشي حالو ويللي جوا مضروب فبطل حدا يشتري مننا...فـ حوولنا على البصل طلع البصل يللي علـ وش ما شي حالو ويللي جوّا مصنصن ... فشتغلنا ببيع الفريز فكان الصف العلوي حبة فحلة والصف يللي تحتو بيكب وبيعمي... لعمى شو تججارنا ولادين حرام! ... حتى الززر بتلاقي الززرات على داير الكيس فحلين ويللي جوّا برفع ئلم الرصاص.
ـ بتعرف ولك ظريف؟
ـ شو يا صهري يا مسند ضهري يا معلم المعلمين أبو عجاج؟
ـ لازم نبيع الجحش والطنبر ونئددم على قرض ونشتري بيك آب ماركة شابانا شنوانا لغدانا وعشانا ونشتغل عل بيك آب نقليات وبالليل منطلع سيرانة أنا وانت ومنحط الحريم ولولاد ورا
ـ أعوذ بالله يا أبو عجاج بدك يانا نشتغل بالفائدة ؟
ـ له يا ظريف أكيد الفائدة حرام لكن مو نحنا يللي بدنا نقبضها... نحنا يللي بدنا ندفعها!
ـ سيدي بفرد شكل حتى لو انو بدنا نحنا ندفعها فهادا حرام
ـ الحرام انو نضل بلا شغل وبلا مصاري يا دابة الله وكيلك صرت اخجل من تطليعات الجحش يللي عيونو عمّال تحكي وتئول عممال تشغلونا متل الجحش والعشا يا ريت خبيزة
ـ طيب وشو بالنسبة إلي يا ابو عجاج؟
ـ انت بتتم معي وبتركب جنبي وبتساعدني أو بتئعود ورا مع الرزق مشان شوفيرية التكاسي ما يمدو مكسورتن... والنص بالنص لحتى الله يفتحها عليك وتعمل متل حكايتي.
الفصل التاني:
ـ مبروكة البيك آب أبو عجاج الله وكيلك وكيل السما والأرض من أول زمور نزلت متل الريح وعرفت انك انت.
ـ طلاع جنبي يا ظريف خلينا نروح نتسبب
ـ كيف دبرت الشهادة يا ابو عجاج؟
ـ ما بدها كيميا ولا ذكا...أنا رشيت صاحب مدرسة تعليم السواقة وهو رشى اللجنة!
ـ لوين بدنا نروح؟
ـ على سوق الهال...طلب وبعدو طلب وطلب وبعدو طلب  ومنطرري إيدا حتى يروح النهار و... وقت بتمسسي بيكفيها المولى ومنروح علكازية منعببي بانزين تفليل وكل واحد فينا بيتيسر على بيتو وكل يوم خميس منئيم المصاري شيات السيارة ومنتئاسم الباقي بالنص.
ـ الحق بيئول التلت لأنك صاحب السيارة فنحنا تلاتة انا وانت والسيارة.
ـ الحق يا ظريف هو النص فأنا معلمك وأدرى بمصلحتك وبدنا نجوزك ونفرح فيك يا ظريف منو منكسب ثواب ومنو بترضى علينا أم عجاج أختك لأنو كأني حاسس يا ظريف انو أختك أم عجاج ناقمة علينا آل أنا ختيرت وما عدت نفعان.
الفصل التالت:
ـ يعني يا أبو عجاج وبلا منئودية بدي احكي مع منك كلمتين.
ـ تفضل
ـ مبارح اختي كانت عننا
ـ بعرف
ـ وسمعتها عم تحكي مع أمي وبدون ما يشتلئو عليي فهمت كل السيرة وئررت اني احكي معك
ـ يعني مو أمك يللي طلبت منك تحكي معي يا هلس؟
ـ وشو الفرق يا أبو عجاج ... ئصدي قول انو الله عم ينعم علينا وصار معنا مصاري فشو المانع  نروح بمعيتك لعند الدكتور؟... منروح لعند فهد ابن ابو فهد ومنحكيلو القصة
ـ يقطع عمرو شو حمار وضلالي متل أبوه ...رحت لعندو يا سيدي و...وصفلي حبة زرقا ولطش 700 ليرة دس مفصل نشا الله بيصرفهون على صحتو.
ـ ايه وشو صار معك؟
ـ ما صار معي شيء يعززيني بئامتو هووي وياها.
الفصل الرابع:
ـ يعني شوارعنا ما كان نائصها اللا هل بسامير ... يفضح عرض هل بسامير في منها بسامير شطلة بتلعن أفطاس الدالوب...يخرب بيتهون ما بيئدروا انو نحنا ما فينا نجيب الدلاويب من المرآب نحنا مندفع دم ئلبنا حئ دواليب وحئ دوزان يخرب بيتهون بتلائي صف البسامير على طول الشارع وممر المشاة مطلوص طلص بالبسامير وخمسين زاوية وزاوية ومنصصف متروسين بالبسامير!
ـ دير بالك أبو عجاج هادا الحمار عم يكسر عليك!
ـ الله لا يوفئو رح يطالعنا عل بسامير... طلعنا والله ... لعمى السيارة عم تهز متل حكاية المرجوحة وكل جسمي عم يهزّ معها.
ـ خود يسارك أبو عجاج وللا بالظاهر عجبتك الهزهزة عل بسامير.
ـ لا يا سيدي عجبتني البسامير وعجبتني الهزهزة، خود موبايلي دئئلي لأختك أم عجاج وهات الموبايل لحتالية حاكيها.
ـ تفضل
ـ أهلين أم عجاج ...زلغطي يا أم عجاج زلغطي...زلغطي وسمعيني ياها عل موبايل
ـ تكرم عينك بس منشان شو؟
ـ حاسس بعوارض نخوة فوجائية يا أم عجاج وجاية فوراً علبيت
ـ بالظاهر مشي حالها الحبة الزرقا؟
ـ لا يا أم عجاج مو الحبة الزرقا مو الحبة الزرقا
ـ لكان شو؟
ـ النتيجة يللي بدك ياها بس مو من الحبة الزرقا
ـ لكان من شو؟
ـ من البسامير
ـ أيا بسامير يا أبو عجاج؟
ـ من بسامير المرور يا أم عجاج  ولك زلغطي زلغطي الله يخليلنا الحكومة.
أبو عجاج
 

اقرأ أيضا ...
تعليقات حول الموضوع
  0000-00-00 00:00:00   بالفعل
هناك من سائقي التكسي الأندال من يمد مكسورته ليسرق تفاحة او برتقالة او أي شيء حتى لو عرض حاله وسيارته لحادث والله نحن شعب سخيف الى ابعد درجة فلقد حدث ذلك أمامي وكان في سيارتي خبير أجنبي ضيف رأى الحادثة فشعرت بالخجل والحرج الشديد
رائد الغزي  
  0000-00-00 00:00:00   حلوة مع اني مو رايد اضحك
هذه الصورة الشعبية للناس البسطاء موجودة فعلاً في سوريا
سامر عيد  
  0000-00-00 00:00:00   الف ليرة
في هذه الظروف المؤلمة هناك من يستغل ظروف الناس لقد اضطررت لأخذ ابنتي الى طبيب عادي بسبب التحسس من غبار الطلع فاعطاها نفس الدواء الذي اشتريناها له ولطش 1000 ليرة ولله دفعتها له متل قلع العين لأكتشف وانا خارجة انه طبيب عادي وغير متخصص فوالله نحن ناس لا خير فينا لبعضنا وكل واحد ناطر يبلص التاني
ام ايهم  
  0000-00-00 00:00:00   لطالما
لطالما فكرت كثيراً بهذه المسامير المحرجة والتي تسبب حوادث في كل شوارع الدنيا توجد مسامير لتحديد ممرات المشاة وبالطبع ممكن تفاديها وغير مغروسة بطيقة لئيمة اما ان تكون هناك مسامير على طول الشارع فهذه مسألة مكلفة وبلا طعمة والجميع يضطر للمرور من فوقها كما ورد في المقالة المسألة تحتاج للضمير لا أكثر وطريقة التعامل هذه مع المواطن يجب تغييرها
فيحاء  
هل ترغب في التعليق على الموضوع ؟
ملاحظة : جميع التعليقات المنشورة تعبر عن رأي أصحابها ولا علاقة لموقع دام برس الإخباري بمحتواها
الاسم الكامل : *
المدينة :
عنوان التعليق : *
التعليق : *
*
   
دام برس : http://sia.gov.sy/
دام برس : https://www.facebook.com/Syrian.Ministry.Culture/

فيديو دام برس

الأرشيف
Copyright © dampress.net - All rights reserved 2024
Powered by Ten-neT.biz