لميس حسين - دام برس:

عيد الأم .. عيد المعلم .. عيد ميلادك وعيد ميلادي ..
وألف مبروك التخرج .. ويخليلك هالصغير الجديد ويبعتلو أحلى ايام ..
ويلي كبرت وعملت عرس وبدنا نباركلها أكيد ..ومشقة المريض  .. ويلي نجح بالتاسع والبكالوريا ..... الخ
العادة السورية القديمة يلي بتتسم بالواجب والكرم وتوزيع الهدايا بمناسبة وبدون مناسبة ..
ركزوا على كلمة قديمة .. لأن سورية الجديدة شعبها الكريم جيبتو فاضية ومبخوشة .. وفي منو ماعد الو جيبة اساساً..
بس أكيد بعدو كريم بأخلاقو وحكياتو يلي بيعملك منها معلقة يباركلك فيها اذا حبيت ..
بس لما توصل القصة للفلوس .. السوري أكتر من لقمة عيشو ماعم يحوش ..
حالياَ .. وبمناسبة عيد الأم الحلوة السعيدة المليئة بالمشاعر الجياشة والدموع ..
يانبع الحنان ..نبع المصاري انطمر وجف .. وعم نحاول نحفر غيرو ..
وأول ما يطلع منو ولو ليرة سورية واحدة فقط .. رح تكون لإلك .. يلي هدايا الدنيا كلها مابتكفيكي..
والمعلم العزيز  .. ورفيقتي يلي تخرجتي .. والبيبي " يلي لسا مابيعرف شو ناطرو "
والطالب والعامل .. والمريض والسعيد والحزين .. وكل السوريين حصتكن محفوظة ..
أنتو بس دعولنا بالتوفيق عند الحفر .. وطولة البال .. وكثرة الأموال !!!