-        ألو دكتور...

 

 

-        معاكي الدكتور سامر.. تفضلي..

 

 

-        قلبي يا دكتور.. قلبي عم يوجعني...

 

 

-        قلبك...!!! يعني شو...

 

 

-        قلبي يا دكتور يعني حوالين الصرة..

 

 

-        قصدك بطنك عم يوجعك..

 

 

-        نفس الشي يا دكتور الله يخليلي ياك...

 

 

-        لاء يا روحي بطنك غير قلبك.. ما علينا... من لإيمتى عم يوجعك بطنك..

 

 

-        صرلو من الصبح يا دكتور والله دبحني...

 

 

-        لاء سلامتك... خبريني وين الوجع؟؟...

 

 

-        بالبيت والله...

 

 

-        أي بيت...

 

 

-        وجعني وأنا بالبيت...

 

 

-        لاء يا أختي.. يعني بطنك عم يجعك على اليمين أو على اليسار..

 

 

-        لا تدخلني بالسياسة دكتور الله يخليك.. مو نكون بوجع البطن منصير بوجع أخمص القدمين...

 

 

-        شو شايف هية أخمص القدمين حافظتيها بالعربي الفصيح...

 

 

-        دكتور فهمني على مهلك..

 

 

-        وجع بطنك فوق على اليمين أو تحت على اليمين أو فوق على اليسار أو تحت على اليسار.... أو حوالين السرة...

 

 

-        ليش شو بتفرق..؟؟

 

 

-        الوجع يلي فوق على اليمين يعني تقريباً بالخاصرة اليمين بيدل على مشاكل بالكبد أو بالمرارة أو بالكلية اليمين.. وهالمشاكل على الأغلب غير اسعافية ... وبتتعالج بالأدوية بعيادة طبيب الأسرة...

 

 

-        شو هالحكي دكتور.. شلون لكن بيقولو عن واحد فقعت مرارتو...

 

 

-        هادا الكلام مو دقيق.. مشاكل المرارة سواء التهاب أو حصيات هية أمراض بتتعالج بالعيادة وشغلة فقعت مرارتو كتير نادرة...

 

 

-        طيب واللي وجعو باليمين من تحت...

 

 

-        إذا كان الوجع هون فهو وجع بيخوف لأنو هون عندنا الزايدة الدودية وهية ممكن بسهولة تفقع... والتهابها حالة اسعافية.. وكمان هون عندنا المبيض والملحقات النسائية اللي ممكن أنو تنصاب بإصابات خطيرة متل أنو تنفتل وبتسبب ألم شديد..

 

 

-        شو هالتسيب.. شلون يعني تنفتل...

 

 

-        أحياناً بيكون تثبيتها على جدار البطن رخو وهادا بيعرضها للانفتال وبالتالي بتنقطع تروية الدم عنها وبتتموت...

 

 

-        يا لطييييف... لاء انشالله ما يكون هيك... طيب الرجل دكتور.. في عندو شي ممكن ينفتل.... بالبطن قصدي...

 

 

-        هلأ شو بدك بهالحكي... الوجع باليمين وتحت احتمال يكون شغلة خطيرة وإسعافية متل اللي حكيتلك عنهون واحتمال يكون شغلات غيراسعافية متل التهاب عقد مساريقية أو داء كرون أو لمفوما.

 

 

-        ولي..... شو هدول...

 

 

-        هدول بحكيلك عنهون بعدين.. خلينا هلأ ننفي الأسباب الخطيرة...

 

 

-        والله يا دكتور أنا وجعي عل اليمين...وتحت...

 

 

-        شهيتك على الأكل كيفها....؟؟

 

 

-        ما أنا هادا يلي دبحني يا دكتور.. ما في شهية بنوب... بس معليش أعرف ليش عم تسأل عنها..؟؟

 

 

-        نقص الشهية دلالة على شي خطير متل التهاب الزائدة الدودية وأنا بشوف أنك لازم تراجعي الإسعاف فوراً..

 

 

-        دكتور أنا راجعت...

 

 

-        راجعتي الإسعاف.. شو قالولك..

 

 

-        لاء دكتور راجعت يعني إقياء...

 

 

-        والله هيك بيقترب التشخيص أكتر من التهاب الزائدة الدودية وصار لازم تتوجهي نحو الإسعاف فوراً...

 

 

-        طيب كمِّلِّي دكتور إذا الوجع باليسار من تحت شو بتكون المشكلة...؟؟

 

 

-        هون بتكون المشكلة على الأغلب نسائية كمان عند النساء... أو أحيانا مشكلة بالحالب..

 

 

-        ليش الحالب موجود بس على اليسار...

 

 

-        لاء في منو على اليمين وممكن يسبب ألم على اليمين بس يعني ما كفرنا إذا نسينا شغلة..

 

 

-        طيب على اليسار ومن فوق؟؟

 

 

-        هون عندنا الطحال والكلية اليسار.. مشاكل الطحال قليلة بس مشاكل الكلية كتيرة..

 

 

-        دكتور... دخلك في زايدة على اليسار...؟؟؟

 

 

-        إذا المريض صارت عندو أعراض زايدة على اليسار فهادا أسمو التهاب الرتوج الكولونية وهادا نادر عندنا لأنو بيصيب الناس يلي ما بتاكول خضار...

 

 

-        ألو دكتور.. بعدك معي...؟؟

 

 

-        أكيد تفضلي....

 

 

-        برأيك شو رح يعملولي بالإسعاف...؟؟

 

 

-        لازم يسحبولك دم مشان نشوف تعداد الكريات البيضاء بالدم يلي بيكون مرتفع بالزايدة ولازم إيكو بطن ليشوفو الزايدة المتضخمة..

 

 

-        وأنا شو لازم أعمل لبين ما أوصل عالإسعاف..

 

 

-        أهم شي تبقي على الريق مشان إذا احتجتي عملية إسعافية لازم تكوني على الريق وحاولي ما يهز جسمك على الطريق لأنو هادا بيزيد الوجع وبنصحك ما تاخدي أي مسكن مشان ما تختفي العلامات اللي بتدل على الزايدة...

 

 

-        دكتور أخي معو كريزات كلاوي لأنو عندو بحص بالكلية...

 

 

-        بحص......؟؟؟؟؟؟!!!!!! اسمها حصيات...

 

 

-        طيب دكتور بشو بتنصحني أنصحو يساوي لما بتجيه الكريزة..

 

 

-        لما بتجي نوبة الألم الكلوي ويلي منتعرف عليها على شكل آلام ماغصة بالخاصرتين مع حرقة بولية أحياناً وتغير بلون البول... لازم المريض يتوقف عن تناول السوائل وياخود مسكن من نوع مضادات الالتهاب غير الستيروئيدية متل البروفين والفولتارين والديكلون ويتوجه عند الطبيب للتأكد من التشخيص..

 

 

-        يتغير لون البول يعني شو... بيصير أزرق..

 

 

-        لاء بيصير أصفر غامق أو بني.. أو أحياناً محمر...

 

 

-        عذبناك دكتور.. يسلمو إيديك...

 

 

-        طيب رح تروحي على الإسعاف...

 

 

-        طبعاً رح روح...

 

 

-        وشو رح تقوليلهون..؟؟

 

 

-        رح قلهون بعتني لعندكون الدكتور سامر وبيقلكون أنو أنا عندي وجع بقلبي واحتمال يكون زائدة قلبية.. فإذا ما كان عندكون شهية على العملية اعملولي إيكو وجنبو صحن رز.. والفتايل من خليها لبوكرا...

 

 

-        حسبي الله ونعم الوكيل... مع السلامة

 

 

                                                     د. محمد سامر آغا