دام برس :

صحيح يا عزيزي أنو مجتمعنا الشرقي فيه كتير من الممارسات الي بتقمع المرأة وبتهضم حقوقها وبتحطها عالهامش،بس هالشي ما بيلغي أنومجتمعنا الذكوري صاحب واجب ولطف وذوووق  وبيطبق مقولة السيدات أولاً بكل شي ! وخاصة السيدات الجميلات!
يعني مثلاً أبسط مثال، الباص بيوقف للبنت الأمورة بنص الطريق، مو بس هيك ممكن يغير الخط من الدوار الشمالي للدوار الجنوبي كرمال عيون الأمورة، أما الشب إذا بيستشهد في سبيل الركوب ما بيوقفلو الباص إلا عند الموقف، مع منية كمان !  لأنو قدام الدقن والشوارب بيتحول الشوفير لمواطن صالح ملتزم بالقااااانون، يا أخي شعب يحب النظام مو بإيدو!
أما بخصوص الشغل فحدّث ولا حرج ! كلو بدو فتاة ذات مظهر لائق وبراتب مغري والخبرة غير ضرورية ! يعني المهم أنثى رشيقة رقيقة، مو مهم حتى إذا ما بتعرف تقرا وتكتب !
أما الشب بيروح ليدور على شغل، فيبستقبلو الموظف بحاجبين مقطبين والعياذ بالله ! وشوي تانية رح يقلو قوم انقلع ! أما الليدي لما تدخل بتشرب شاي وقهوة ويمكن يعزمها عالفطور مع ابتسامة عريضة رح توصل لأدنيه!
وهي لسا ما حكينا، عن اللطافة واللباقة  للسيدات الجميلات بالأماكن العامة، وبالشارع وبالسوبر ماركت وعند إشارة المرور وبقاع المحيط وعلى سطح القمر !
على فكرة يا عزيزي.. هاد بحد ذاتو هو شكل من أشكال تهميش المرأة ، نوع مبطن من أنواع الاستبداد الي حكينا عنو بالبداية، بينظر للمرأة نظرة سطحية، وكأنها سلعة أو مشهد سينمائي للاستمتاع !
إذا فعلاً أنت مؤمن باقتباس السيدات أولاً ، خلي الإناث الي بحياتك يقررو مصيرهن أولاً، ويختارو شريكهن أولاً، ويحددو مستقبلهن أولاً، خلي أختك ومرتك وبنتك شركاء بالقرار، احترم رأيهن ، قدر مشاعرهن، عطيهن حقوقهن كاملة، هيك بيكونو السيدات أولاً !
مو اللباقة أنك تبتسم للبنت وتفضلها على الشب، وبس ترجع عالبيت تتحول لأبو شهاب وتحول بيتك لباب الحارة وتطلب من أختك تاخد أذنك اذا بدها تتنفس !
مجتمع يعاني من انفصااااام بالشخصية ... عزيزي وقف لقلك وجاوبني بصراحة ... السيدات أولاً ولّا آخراً؟!!

ريتا قاجو